' BABEL ' - bunachar sonraí ilteangach le haghaidh ainmneacha dúchasacha phlandaí fiáine na hEorpa.

Is í an Laidin teanga idirnáisiúnta na luibheolaíochta. Cé is moite de na hathruithe is gá sa tacsanomaíocht, ar crá croí coinneáil céim ar chéim leo uaireanta, tá buaine ag baint leis an Laidin mar is nodaireacht choiteann i measc luibheolaithe í. Bíonn luibheolaithe in ann a chéile a thuiscint toisc gur nithe caighdeánacha ainmneacha Laidine na bplandaí ó tharla gur sa Laidin a fhoilsítear cuntas ar na speicis sa chéad dul síos. Is cuid dár n-oidhreacht córas dé-ainmneach Linnaeus agus bheadh sé an-deacair gníomhú dá uireasa.
Na déanaimis dearmad, áfach, de na haimneacha dúchasacha atá in úsáid i measc na ndaoine leis na cianta cairbreacha. Ní mar a chéile na hainmneacha sin in dhá thír ar leith ná in dhá cheantar féin. Athraíonn na haimneacha scaití ó ghleann nó ó shráidbhaile go chéile! Is minic gur filíocht na hainmneacha dúchasacha agus ba mhór an peaca iad a chailleadh. Toisc gur Sasanach mé, is iad na hainmneacha Béarla is fearr atá ar eolas agam, ach is féidir an rud céanna a rá faoi na hainmneacha dúchais ar fud na cruinne. Maireann iarsmaí sna hainmneacha sin den stair, den bhéaloideas, den phisreogacht agus den leigheas agus is oidhreacht eile iad i bhfriotal faoi leith atá gach pioc chomh luachmhar leis an rud a d'fhág Linnaeus againn chun freastal ar riachtanais na hEolaíochta.
Táim chomh haineolach sin nach bhfuil a fhios agam fiú go beacht cá mhéad teanga a bhfuil mé in ainm is a bheith ag plé leo. Dealraíonn sé i bhfianaise a ndeir Ethnologue go bhfuil breis agus dhá chéad acu i gceist. Liostáiltear thíos na teangacha ar tháinig mé trasna orthu go dtí seo mar aon le roinnt foinsí. Fuaireas an t-eolas ón iliomad daoine a raibh mé i dteagmháil leo (a lán díobh ar an idirlíon). Tá mo bhuíochas ag dul dóibh uile.

Más Eorpach thú agus mura bhfuil do theanga dhúchais féin le fáil anseo, impímid ort an méid sin a chur in iúl dúinn láithreach!
Má tá ainmneacha plandaí agat, is amhlaidh is fearr é. Is cuma cé acu cúpla ainm atá agat nó an oiread agus a líonfadh leabhar. Ba bhreá linn cloisteáil uait. Ar ndóigh b'fhearr i bhfad na haimneacha dá mbeidís i bhfoirm leictreonach cheana féin. Is ceart na haimneacha a cheangal leis na hainmneacha Laidine atá in úsáid faoi láthair sa chaoi gur féidir a rá cad dó a dtagraíonn do chuid ainmneacha.
Tá sé den riachtanas chomh maith go ndéanfaí do bhunachar sonraí a ainmniú as a theanga féin. Mar sin cuir in iúl dúinn le do thoil an teanga atá tú a úsáid. (Agus mura dtaitníonn leat an bhratach atá i bhfeidhm againn chun do theanga nó do chanúint a chur i láthair nó mura bhfuil bratach ar bith ar taispeáint - tá an Bhriotáinis, an Chatalóinis, an Mhallorcais, an Chorsaicis, an tSairdínis, an Phléimeannais agus an Laplainnis (Sami) ar iarraidh fós, cuir i gcás - b'fhéidir go mba mhaith leat leagan ceart údarásach a chur chugainn!)
Dá mbeifeá toilteanach an téacs atá á léamh anois agat a aistriú, ba bhreá linn cloisteáil uait ionas gur féidir linn leaganacha ilteangacha den leathanach seo a sholáthar.
Ar an drochuair ní féidir an láithreán seo a chuardach agus ní dócha go mbeidh ann sa meántéarma ach liosta foinsí. Ina dhiaidh sin beidh fáilte roimh dhuine ar bith a bhfuil fíorspéis aige san ábhar agus déanfar gach iarracht an t-eolas atá sé a thóraíocht a chur ar fáil dó.

O thosaigh mé féin ar an tionscnamh seo, chuir mé aithne ar Roger Whitehead, mar is daoine an bheirt againn arb ionann ár sainspéiseanna. Is cúis áthais dom go bhfuil Roger agus mé féin ag obair as lámh a chéile. Is mar seo atá an obair roinnte suas againn eadrainn beirt: le teangacha na Breataine agus na hÉireann a bhíonn Roger ag plé .i. Béarla, Gaeilge na hAlban, Gaeilge na hÉireann, an Mhanainnis, an Bhreatnais agus an Chornais (ach gan Fraincis na nOileán Angla-Normannach a chur san áireamh). Mise atá freagrach as an gcuid eile den Eoraip, ach ar ndóigh ní bheidh mo chuidse den obair chomh mion. Beidh an-ríméad orainn cloisteáil uait má tá aon ní agat a mbeidh spéis againn ann dar leat, nó más dóigh leat gur féidir leat adhmad a bhaint as an eolas atá bailithe againn. Táimid ag súil gurb iomaí sin feidhm a bhainfear as an mbunachar sonraí amach anseo.

NOTA: níl ach fíorbheagán dár gcuid sonraí ar an idirlíon. Déan teagmháil linn is féachfaimid leis an eolas atá uait a sholáthar. Má chuireann comhlacht tráchtála iarratas isteach, seans go ngearrfar táille oiriúnach orthu.

Táimid fíorbhuíoch do gach duine a chabhraigh linn le déanaí. Ina measc siúd áirítear na daoine seo a leanas:

Alessandro Alessandrini	Raino Lampinen	Jaume Ollé
Vera Besse	Lennart Nilsen	Rolf R. van de Pavert
Marco Bleeker	Pavel Pisa	Brane Vries
Rob Heijman	Boris Turk	Mehmet Pojon
Toomas Kukk	Barbara Weninger	James L. Reveal
Stig B. Neilsen	Carlos Aguiar	Vladimir Vladimirov
Wouter Pilger	Gonzalo Fernández Borrajo	Aart Voswinkel
José Manuel Sánchez	Girolamo Giardina	Francois-Jean Blanc
Anna-Lena Anderberg	Milan Jovanovic	Turcsányi Gábor
Brian Bonnard	Michael Kleih	Yvon Brochet
Lodewijk van Duuren	Henriette Kress	Ali Kandemir
Jeff Humm	Urmet Lee	Juan Carlos Baiges
Nicholas J. A. Williams	Jose Matas Rubi	Mary Cassidy
Susanne Starke-Perschke	Jordi Pietx	Sverre Bugge Davidsen
Andreas Athanassopoulos	Michel H, Porcher et al.	Andrés Lozoya
Lumir G. Janku	Bernard Blion	Bernhard Luft
Nanni Falconi

' BABEL ' - bunachar sonraí ilteangach le haghaidh ainmneacha dúchasacha phlandaí fiáine na hEorpa.

Liosta Leabhar agus Foinsí

[Is ionann na huimhreacha idir lúibíní cearnógacha agus líon na dtacsón a d'aimsîomar go dtí seo.]